#Poetry: कइसे क घरवा चलाई परदेसिया | #NayaSaveraNetwork

नया सवेरा नेटवर्क

 कइसे क घरवा चलाई परदेसिया  

बढ़ल महंगाई बाटइ,घर में न पाई बाटइ,

कइसे क घरवा चलाई परदेसिया।

कुआं संग खाईं बाटइ,फंसी तोरि लुगाई बाटइ 

हमरा क आवेला रोवाई परदेसिया।

पहिले जउ जनती निर्मोही बा सुगनवां,

तोहरी कसम हम ना अउती गवनवां,

टुटिगा सपनवां, सावन जस नैना बरसें,

केकरा क दरद बताई, परदेसिया।

हमरा करेजा फाटइ,लखी कवनउ डोलिया,

अगिया लगावइ हिय मा,हर दिन कोयलिया,

कमवा सतावइ,कागा कुछु ना बतावइ राजा,

होइ न जाए हमरी विदाई परदेसिया।

पोर-पोर टुटे,जियरा धक्क-धक्क बोलइ हो,

बहि-बहि कजरा हिया क राज खोलइ हो,

मनवा न धीरा धरे,बंडखोरी हिया करे -

बार-बार आवइ अंगड़ाई परदेसिया।

रतिया में तोहरा क देखलीं सपनवां,

हमरा क सजना झुलावेला झुलनवां,

घिरि आइल बदरा,भिगाइ गइला अंचरा हो,

अंसुवां से तकिया भिगाई परदेसिया।

केतना कही हम सइयां, केतना छुपाई हो,

तोहरे बिना अब कइसे दियना बुझाई हो,

बुझल-बुझल चेहरा,न बूझि पावइ हमरा केउ 

भिलाई से होई न भलाई परदेसिया।

सूनी बा कलाई,कइसे मेंहदी रचाई हो,

ननदी टिपोरी बोलइ,गरियावइं माई हो,

आंखि डबडबाई हमरी,केउ के दिखाई नाहीं

समय हमके केतना सताई परदेसिया?

सुरेश मिश्र

Ad

Ad

Ad