#Poerty: अपने सइयां क हाल का बताई सखी | #NayaSaveraNetwork

नया सवेरा नेटवर्क

अपने सइयां क हाल का बताई सखी

आवेला रोवाई सखी न।

गिरत-परत पिया आवइं,

धइ केवाड़िया खटखटावइं,

डरवा लागइ घर मा 

केउ भी घुसि न जाई पिया।

 आवेला रोवाई सखी न।

रोज आवइं होइके टुन्न,

रहइं सेजरिया पे मुन्न,

कुछ न बोलइं ओनके -

पकड़ि जब हिलाई सखी।

आवेला रोवाई सखी न।

दिल पे लागइ हमरे चाटा,

लेइं जोर कऽ खर्राटा,

निकुरा घुर्र-घुर्र -

सुनिके हम अघाई सखी।

आवेला रोवाई सखी न।

छटपटाई रात-रात,

हमरा कुछुवउ ना सुझात,

खेत परल अहइ-

करइ के बोवाई सखी?

आवेला रोवाई सखी न।

मुहंवां जब भी ओनकर देखा,

गुटका भरल बा हमेशा,

यहर-वहर थुकत -

रहइं पचपचाई सखी।

आवेला रोवाई सखी न।

कबहुं करी जउ ढिठाई,

शरम आवइ, कऽ बताई,

झोंटी पकड़ि मोर,

कइ देला धुलाई सखी।

आवेला रोवाई सखी न।

अपने सइयां क हाल का बताई सखी

 आवेला रोवाई सखी न

सुरेश मिश्र

Ad

Ad