#Poetry: कब बरसी सवनवाँ? | #NayaSaveraNetwork

नया सवेरा नेटवर्क

कब बरसी सवनवाँ?

...

टप-टप चुवेला पसीनवाँ,

हाय, कब बरसी सवनवाँ। 

लुहिया के चलले से सूखेला कजरवा,

ऊपरा से नीचवाँ कब बरसी बदरवा।

गरमी से आवें न पजरवाँ,

हाय, कब बरसी सवनवाँ।

टप-टप चुवेला पसीनवाँ,

हाय, कब बरसी सवनवाँ।

ताल-तलइया,नदिया,पोखरी सुखैलीं,

अपने बलम के हम गोनरी सुतऊलीं।

चिरई जुड़ाई कब खोंतनवाँ,

हाय, कब बरसी सवनवाँ।

टप-टप चुवेला पसीनवाँ,

हाय, कब बरसी सवनवाँ।

बाग-बगइचा लोग लालच में कटलन,

ताल-तलइया,पोखरी मिल बाँट पटलन।

धुपिया से नाचेला कपरवा,

हाय, कब बरसी सवनवाँ।

टप-टप चुवेला पसीनवाँ,

हाय, कब बरसी सवनवाँ।

लागी नाहीं पेड़ पंचो आम का चुसाई,

नहीं होई रोपनी तव ओखरी का कुटाई।

सोहरी कब खेतवा में धनवाँ,

हाय, कब बरसी सवनवाँ।

टप-टप चुवेला पसीनवाँ,

हाय, कब बरसी सवनवाँ।

बरसत बदरवा तव डालित हम झुलवा,

खिली जात गोंदिया में हमरे भी फुलवा।

होई जात ठंडा ई अँगरवा,

हाय, कब बरसी सवनवाँ।

टप-टप चुवेला पसीनवाँ,

हाय, कब बरसी सवनवाँ।

गीतकार :  रामकेश एम. यादव, मुंबई

विज्ञापन

Ad